提到花牌，大家可能都會聯想到較多見到花牌嘅盂蘭節（農曆七月十四）或者天后誕（農曆三月）。而盂蘭節俗稱鬼節（又叫中元），其中常見燒野俾孤魂野鬼的習俗，如祭祀中那些經生的唸詞所言，為求都是「陽樂陰安」。但查實從事花牌這一行，都無乜話有些特別的宗教成份。若果循花牌行業來計，其實最關事該係拜魯班師傅，因為花牌都係些建築工藝野。
每種宗教，總會有些做信徒就要有決心信守的規條。我自己其實都無話信邊個宗教，實情亦唔識拜神。不過每次幫邊個廟做花牌時，我都照例入廟拜拜，是為一種尊重，到底生意亦是由此而來。另而，雖然掛花牌都無話要摘甚麼吉時，但我阿爸以前都話，這一行都好係要睇《通勝》做人，但我地睇的，不是佢算命術數之類的東西，而是對於中國人同文化社會習俗息息相關的曆法節氣等，所以我對這方面都有興趣認識下。
小時候都有跟人去教會攞奶粉之類，也讀了間天主教學校，亦有個親戚同教會熟些，去過聽，但始終聽唔入耳。我閒來都會讀下佛經，覺得讀下無壞。但其實前世來世係點都無人知，宗教不就體現在現世今生，如點樣影響人個心，修心又影響人個腦，正面可以作為一種心靈的心理扶持，而求安心以外，或也可以係一種警惕，但也忌極端入迷。
宗教其實反該讓人學曉放下，放下權力同慾望，導人向善，助人自助。就如盂蘭節派米，就一方面是種捨的心修，另方面不又可以讓低下階層的人們因這施予而受益？
