西九文化區未有耐起，香港視覺文化博物館「Ｍ＋」（中文叫乜真唔多知）唔喺自己地頭嘅空地，又唔喺毗鄰嘅豪宅山寨或者佐敦官涌搞展覽，偏係走嚟油麻地，與其話選擇「地點」係為左展覽能緊扣地方文化場境，不如話成件事係出於「時機」考慮，湊夾ARTFAIR（國際藝術博覽會）展期，一切動機和對象不就清楚哂？怕且基層社區市民從不是Ｍ＋眼角的心儀對象，今次社區只係作為視覺文化遊客嘅佈景板，能免費入場似就經已係益你街坊。
喺佢開幕嗰日，有些街坊朋友被攔阻，入不到酒會，有點嚕嘈，但其實佢就係俾哂所有湊巧路過嘅人入，都唔代表什麼，開幕酒會斷唔係B君街頭派飯派罐頭行動，活動真有心平民化嘅話，就會有地區宣傳，安排從頭到尾都同宜家截然不同啦。策劃散佈市區嘅藝術展覽，進佔吉舖或公共空間，只要有錢有面，這絕對難唔到Ｍ＋，但想Ｍ＋下下外展都先來落區打躉一年半載？佢地信呢一套，就唔會有西九文化區啦！
若Ｍ＋這方面真係無得救，佢地選嘅本地藝術家能否有想法同作為，實行「騎劫」Ｍ＋做好佢？睇下今次藝術家陣容，不少都同活化廳有來有往吖，關黃夫妻檔仲係齊齊替活化廳開山嘅藝術家添！關黃檔佢地挪了唐唐「捍衛核心價值是香港的核心價值」金句來玩，鑄個核心價值金幣，這要金定要心嘅把戲，不就係佢地兩人喺活化廳「小西九雙年展」時，那故意喺社區跌失銀包，尋人路不拾遺交回活化廳那作品嘅足金版？不同嘅僅係，那時候活化廳只拿得出幾張廿蚊紙放入幾個人們捐出嘅舊銀包。但鬼叫活化廳就係咁窮咩！至於圍繞6.4搞節目，冇問題喎，話時話，藝發局幾屆威尼斯雙年展都興喇，不過藝術家白雙全，那年頂多不過是放個黑氣球。
活化廳「小西九雙年展」仲還有件作品，有個人唱著首詩：「...那倒閉店舖的招牌仍高掛著，多少年了？有時在雨中忽然閃過，那沉睡的霓虹更像幽靈...」，這不恰又同跟Ｍ＋展覽中藝術家梁美萍以澳門大馬路拆下來嘅汽水廣告牌為作品相呼應？幾件舊招牌大模屍樣攤在公園草地，抱歉，除左想起區中偷鐵變賣嘅新聞，我立即聯想到艾未未喺德國文件展中，那以其搜刮埋埋成堆中國古舊木門所搭起嘅雕塑在遇強風塌左後嗰個樣。那次艾神嘅作品實情係過唔到德國人嘅嚴格安檢的！不過策展人卻終屈服於出錢的私人收藏家！塌左都仲要話咁仲好睇啦！Ｍ＋由得幾個廣告牌掉在地面，唔硬要掛佢上那些失修樓宇外牆，都算係咁？你都知我哋區幾多外牆跌石屎嘅新聞啦！
當代藝術作品，最鍾意叫人反思社會生活，香港文化據說要躍進新時代，藝壇也從未如此風光，但它對自己發跡的社會反思又喺邊？視覺藝術灑金同百姓生活命途嘅（視覺文化）落差，刻意出現在油麻地，實在叫人慘不忍睹。最後，十足講股員來個利益申報，以上嘅Ｍ＋展覽，我有收到邀請咭，但都係睇下報導，係冇去睇嘅。
 |
| 艾未未於文件展的作品《廟》 |
 |
| 梁美萍的汽水廣告牌作品 |
