小廳長的話: 流動吧!油麻地! 酒是我們的共通語言!

429的「流動酒吧大作戰」,活化廳以及來自日本、韓國、台灣的朋友同一眾酒徒一齊到廣東道排檔派酒,聲聲「飲勝」不絕於耳。街坊張深記的志偉再次拎來燒豬一隻,於街頭分豬同味,參加者將帶來的啤酒放到流動酒吧車上分享,自釀的「油麻地啤」則更震撼街坊味蕾,出現了兩種極端反應:「乜嚟㗎?」及「好正喎!」大家都好好奇究竟如此新奇的酒料是點樣釀成的呢?

去完排檔之後,流動吧停泊於地士道街休憩公園,得日本樂手搖滾表演助慶。至於成班細路哥就既開心又無奈,常常來到流動吧前問點解十八歲先俾飲酒?唯有俾個蓋佢聞下有幾香,又或讓他們揮揮啤酒旗,口渴就還是喝檸檬茶算啦。隨後日韓台港朋友又於公園內即場以FM廣播做節目,一百米範圍街坊都聽到,原來在日本小範圍廣播並不犯法,唔知油麻地幾時先可以有個社區電台,搵街坊做節目,播佢哋鐘意嘅歌呢?

小廳長上