溶入新社區點滴
又到咗活化廳年年跟藝發局傾續約嘅時候，不知不覺嚟到活化廳都有兩年喇。其實要講同油麻地呢個社區建立關係，都唔係好易諗有乜可以講，話哂我長期都唔喺住這區，從九龍東屋企往返深水埗，到後來去左兆基創意書院，再到活化廳，都係搭架２號Ａ巴士；話同街坊建立關係唔係話冇，但同以前往嘅街鄰街里關係比較，始終大不如前。有啲關係，真係要日積月累，日日接觸，或者持續經常幫襯咁建立出嚟。
譬如我日日返嚟，係旺角落車，經常都幫襯波鞋街檔報紙檔，佢過左十一點，就冇紙巾送，不過就會減壹蚊，我經常都同佢買，買到熟了，就都唔洗講要邊一份報紙，間中老闆佢可能會主動話，唔好意思，今日入得少左紙，乜報賣哂囉，咁我就都話聲唔該，就唯有去第二檔買咯。雖然係通過買報紙成為熟客，大家都可以仲係幾陌生，反而有日又如常去買報紙，老細佢見到我就大聲咁話，我噚晚見你上電視喎！結果都係要經過電視媒體，佢先至忽然知道咗我呢個客多一啲嘢。
又例如三餐呀，我唔係經常係油麻地呢頭食嘢，當初嚟到，多啲幫襯強記，佢有些似以前深水埗我間舖附近間茶餐廳，平平地又近近地，不過喺幾個熟街坊嘅介紹下，我依家都多咗幫襯朗豪坊車站上邊嗰個熟食中心，睇吓下次會唔會喺嗰度撞倒你？又或者你地仲有冇好介紹俾嚟呢？
