 |
| 愛心爆棚的黃生抱着排檔佳姐的貓BB |
嗰間舊鋪就係房署元洲邨街市，好開揚，在停車場埋邊仲有花圃位，我就好多時都喺鋪外邊做野，喺地下寫花牌大字。佢向東北，有時幾凍，落雨天就麻煩些，但反而舊時嘅職員都好照應，有傾有講，街坊更唔會下下就話投訴你乜乜物物，大家包容和洽。
那時候，係樓梯底有隻貓乸，我地幾間鋪主得閒，就用貓糧引佢出嚟，後來我就收養左佢隻小貓女，因為皮色，就叫佢做黑白，鼻下有一點黑，幾似那些「日本仔」添:P。佢好過癮㗎，開心時候跳下跳下擦下你。佢又聽教，我寫完大字等乾，佢走上去，我同佢話落番嚟！我要靠佢嚟養你㗎！佢聽左就以後都唔再跳上去搞搞震喇。不過佢始終係街貓，最鍾意爬上花圃那棵我係垃圾房執回來、生下生下成幾米高的樹上抖，捉下雀仔，晏晝就去下巡鋪。其實動物都屬於大自然，鍾意自由，有佢自己嘅心情，好多人養佢為治鼠，但其實佢地仲俾好多樂趣你，又令街坊多左好多話題。佢日求兩餐，晚求一宿，又無攻擊性，你唔鍾意行開大家相安無事。都唔知點解依家咁多人恃強凌弱，可能受左強權欺壓，就轉向小動物發洩？
後來我搬到福榮街閣樓鋪才捱得住租，黑白呢，就成日自己跑番兩個街口返去元洲邨。人對地方有感情，貓都一樣有靈性，慢慢佢仲就更加無再返鋪喇，而我不久又就被迫再被趕上路了。
