2012年2月1日

黃師傅與你: 新年風車花牌


◆ 文:壞人


適逢新年喜慶節日,很多市民都會買個轉運風車擺喺屋企或放喺舖頭,祈求來年風調雨順,事事順心,轉個靚運。咁大家又知不知道風車其實點整?除左可以去黃大仙或到年宵市場買,仲有邊度會有獨一無二的轉運風車呢?話明獨一無二,當然係買都未必買到。年廿七嗰日,活化廳每月一次的「你敢學,我敢教」活動,就正正係教大家整新潮手造花牌風車,命運在你手,改運靠雙手,不如就自己手造一個啦。嗰日一班參加者由六點半玩到十二點半都仲不捨得走人,被廳長譽為有史來最長時間的工作坊。
      手造風車可能大家小學勞作堂都有學過,但今次風車製作特別之處係加入左花牌師傅黃生製作傳統花牌的技巧。我哋依舊用竹篾來做風車的底架,扎好支架就用鐵絲作支撐,跟住用有花紋圖案的彩色銻紙摺風車,先摺大風車,再將細風車放上去,大風車與細風車之間用膠飲管固定。看似很易的製作,原來要使風車順風順水的自由轉動,係殊不簡單。我哋用上四塊珠片串上大風車和細風車,那就不會因磨擦令到風車轉到卡住卡住,最後貼上花型的銻紙,同埋在描紅紙上用毛筆寫上祝福的字句,手造花牌風車便大功告成。工作坊嗰日我哋有初階及進階版。
     黃生一直都認為雖然傳統意義上的花牌業是式微了,但總有十萬樣方法可讓花牌這個行業找到新出路。今次是繼迷你花牌後,首次研製出新款式:花牌風車,黃生說笑在年宵賣有得賺咁話!原因係靚!其實,在未正式開始工作坊前,我哋花上六句鐘才研製出合心意的花牌風車,手藝的確是嘔心瀝血卻使人好快樂的好嘢來的,就梗值得保存。想免費學一門手藝,記得密切留意我哋每月一次的「你敢學,我敢教」活動喇!

沒有留言:

張貼留言