2012年2月1日

小廳長的話





新年伊始,先代表活化廳祝各位街坊龍騰虎躍龍飛鳳舞龍咁威龍馬精神龍精虎猛!
一個月過得真快,話咁快就係《活化報 》嘅第二期。回想起最初只係想印500份,誰知道活化報出街後甚得各方朋友街坊喜愛,不消一星期便派光了,於是加印再加印,在網絡上甚至有台灣朋友到我們的臉書留言希望索取。很可惜,我們的派發點都想集中在油麻地社區、在活化廳及附近的文化空間。現正努力開拓街坊商戶加入我們的派發點。
     初七人日,我們策劃了扮鬼扮馬拜年巡遊,巡到廣東道街市問及街坊新年願望,福嫂話:希望大家多啲來街市買餸咁話。講真廣東道街市真係個好「雜」嘅地方,「雜」係邊?一個市集包括了各式店鋪:菜檔肉檔、水果、游水海鮮、五金等等,應有盡有,仲駛咩幫襯超市!不過上次推出「格格價」專欄後,有街坊報料話超市啲餸其實平過街市,有間上幾星期啲豬肉仲要七折,有間超市仲要係深水埗開間廉價凍肉,實行同街坊凍肉鋪拼過!為個荷包著想,街坊當然幫襯超市啦,精明咁話;不過計我話,大集團總係畀啲甜頭你,等你慢慢依賴慣,然後唔驚唔覺升你價;精明嘅街坊當然會識得格價;不過當你幫襯得佢多,隔離左右啲細鋪無晒生意加埋貴租就聽執笠,到時揀都無得你揀,咁就真係精過籠喇!


     同一道理,好多嘢好似係免費,背後其實未必咁著數。好似依家如果我哋想節省埋6蚊報紙錢,可以去地鐵站口拎份免費報。但大家都知道這些報紙的主要收入是靠廣告得來,而廣告收入就係靠派發量。但拎左免費報嘅人甚少會再付錢買大報,於是主流報的生存空間便會收窄,報導的水準也下降,有些收穫,也有些付出。但這是資本世界的邏輯,究竟有無咩係真係真係free的呢?其實一些真正無私的事還不難在我們的社區找到。好似我哋上次幫排檔花店街坊換燈膽,伯伯便送了我們一盆風信子,當我話要俾番錢,伯伯便堅拒道:「唔好成日講錢!」聽後小弟真感動。又例如有次路過菜檔,見到佳姐在湊緊個好可愛的BB女,原來係街坊要去睇醫生,轉頭先返來接走。這些街坊街里的感情在我阿媽一代很普通,在我哋一班八十後卻覺得愈來愈超現實。
      所以講到尾,同樣都係免費,不過今日卻係「難為正邪定分界」;而《活化報》幸得活化廳的財神「藝術發展局」射住,因此可以反市場地報導上海街這個小社區的芝麻綠豆二三事,講一啲區議員都唔關心的議題。也好彩有藝發局,我哋呢班年青貧窮藝術家可以用佢哋的錢做啲真真正正同街坊開開心心一齊玩,帶動下這個社區活力的(藝術)活動。新一年祝上海街社區,仲有藝發局上下生氣勃勃,龍過龍年!


之前無參加過我地活動嘅街坊,遲啲見!


小廳長上

沒有留言:

張貼留言